कार मायकेल रोड स्फोटक प्रकरण : सचिन वाझे, प्रदीप शर्मांसह १० आरोपींवर आरोप निश्चित; पाच वर्षांनंतर खटल्याला गती!
मुंबई : कार मायकेल रोड स्फोटक प्रकरण आणि उद्योगपती मनसुख हिरेन हत्या प्रकरणात विशेष एनआयए न्यायालयाने महत्त्वाचा निर्णय देत बडतर्फ पोलिस अधिकारी सचिन वाझे, माजी एन्काऊंटर स्पेशालिस्ट प्रदीप शर्मा यांच्यासह एकूण १० आरोपींविरुद्ध आरोप निश्चित केले आहेत. आरोपमुक्त करण्याच्या याचिका फेटाळल्यानंतर न्यायालयाने हा निर्णय दिला असून आता या बहुचर्चित प्रकरणाच्या नियमित सुनावणीचा मार्ग मोकळा झाला आहे.
कोणते आरोप ठेवण्यात आले?
एनआयएने आरोपींविरुद्ध UAPA (बेकायदेशीर कृत्य प्रतिबंधक कायदा) अंतर्गत दहशतवादी कृत्य आणि दहशतवादी कट रचल्याचे आरोप ठेवले आहेत.
भारतीय दंड संहितेतील कलम ३०२ (हत्या), अपहरण, गुन्हेगारी कट रचणे तसेच इतर संबंधित कलमांखालीही आरोप निश्चित करण्यात आले आहेत.एनआयएचा दावा काय?तपास यंत्रणेच्या म्हणण्यानुसार, सचिन वाझे हा संपूर्ण कटाचा मुख्य सूत्रधार होता. कार मायकेल रोडवर स्फोटकांनी भरलेली स्कॉर्पिओ उभी करण्यात आली होती. या कटाची माहिती बाहेर येण्याची भीती असल्याने व्यावसायिक मनसुख हिरेन यांनी जबाबदारी स्वीकारण्यास नकार दिल्यानंतर त्यांची हत्या करण्यात आल्याचा आरोप एनआयएने केला आहे.
पुरावे नष्ट करण्याचाही आरोप…
गुन्ह्यानंतर डिजिटल व्हिडिओ रेकॉर्डर (DVR), सीसीटीव्ही फुटेज आणि मनसुख हिरेन यांचा मोबाईल फोन नष्ट करून पुरावे मिटविण्याचा प्रयत्न केल्याचाही आरोप आरोपींवर ठेवण्यात आला आहे.पुढे काय?न्यायालयात आरोप वाचून दाखवल्यानंतर सर्व आरोपींनी स्वतःला निर्दोष असल्याचे सांगितले. आता पुढील सुनावण्यांमध्ये साक्षीदारांचे जबाब आणि पुराव्यांच्या आधारे या प्रकरणाचा नियमित खटला चालवला जाणार आहे.
