ठाणे ३० : पर्यावरणपूरक गणेशोत्सवाला प्रोत्साहन देण्यासाठी ठाणे महानगरपालिकेच्या माध्यमातून ‘माझी वसुंधरा’ या उपक्रमातंर्गत पर्यावरण दक्षता मंडळ आणि एन्व्हायरो व्हिजील यांच्या संयुक्त विद्यमाने “माझे घर, माझा बाप्पा” या अभिनव उपक्रमांतर्गत विनामूल्य गणेशमूर्ती कार्यशाळा व जनजागृती कार्यक्रम 2026 आयोजित करण्यात आला आहे. या उपक्रमातून शाडू मातीपासून पर्यावरणपूरक गणेशमूर्ती स्वतः तयार करण्याचे प्रशिक्षण नागरिकांना दिले जाणार असून पर्यावरण संवर्धनाचा संदेशही दिला जाणार आहे. हा उपक्रम ठाणे महापालिकेच्या पर्यावरणपूरक गणेशोत्सव मोहिमेचा एक भाग असून या मोहिमेत जास्तीत जास्त संख्येने सहभागी व्हावे असे आवाहन महापौर शर्मिला पिंपळोलकर व आयुक्त सौरभ राव यांनी केले आहे.
ही कार्यशाळा ऑगस्ट महिन्यातील प्रत्येक शनिवार व रविवार आयोजित करण्यात येणार आहे. कार्यशाळेचे ठिकाण टीएमसी शाळा क्र. 19-20, नौपाडा, ठाणे असून सकाळी 10.00 ते दुपारी 1.00 आणि दुपारी 2.00 ते सायंकाळी 5.00 अशा दोन सत्रांमध्ये प्रशिक्षण दिले जाईल.
कार्यशाळेत सहभागी होण्यासाठी नागरिकांनी नोंदणीसाठी देण्यात आलेला QR कोड स्कॅन करावा. सहभागी होताना दोन लहान आकाराचे कागद, जुनी वृत्तपत्रे किंवा टिश्यू पेपर (2नग), मूर्ती कोरण्यासाठी कार्डबोर्ड किंवा कोणतेही हार्डबोर्ड, 20 x 20 सें.मी. आकाराचा एक पाट आणि एक वाटी स्वतःसोबत आणावी.
ठाणे महानगरपालिकेने सर्व नागरिक, विद्यार्थी, पालक आणि गणेशभक्तांना या उपक्रमात मोठ्या संख्येने सहभागी होण्याचे आवाहन केले आहे. पर्यावरणपूरक गणेशोत्सव साजरा करण्यासाठी प्रत्येकाने स्वतःच्या हाताने शाडू मातीची गणेशमूर्ती तयार करून “माझे घर, माझा बाप्पा श्रद्धा, संस्कार आणि आनंदाचा संगम” ही संकल्पना प्रत्यक्षात उतरवावी, असे आवाहन करण्यात आले आहे!
