Bhuleshwar – क्रेन तुटून ‘भुलेश्वरचा राजा’ कोसळला; मंडळाच्या अध्यक्षांसह दोघांचा दुर्दैवी मृत्यू, ५ जखमी!
भुलेश्वर २३ : मुंबईतील विविध गणेश मंडळांचे राजे-महाराज आपापल्या मंडपांमध्ये दाखल होत असताना आणि संपूर्ण मुंबापुरीला गणरायाच्या उत्सवाचे वेध लागले असताना शनिवारी अघटित घडले. भुलेश्वरचा राजा आपल्या मंडपापासून ५० ते ६० फूट अंतरावर असतानाच भयानक विघ्न कोसळले. राजाची ही महाकाय मूर्ती कुणाला काही कळण्याच्या आत कोसळली आणि मूर्तीच्या खाली अनेक जण सापडले. या दुर्घटनेत मंडळाचे अध्यक्ष संकेत नेवशे आणि पदाधिकारी बृजेश जोशी हे दोघे ठार झाले असून, अन्य पाच जण जखमी आहेत.भुलेश्वर राजा सार्वजनिक गणेश मंडळाचे हे ६३ वे वर्ष आहे. भायखळ्यातील अनिकेत देसाई यांच्या कार्यशाळेतून राजाची मूर्ती शनिवारी संध्याकाळी वाजत-गाजत भुलेश्वरमधील आपल्या मंडपाकडे निघाली. मात्र, प्रतिष्ठापनेपूर्वीच मूर्तीच्या विसर्जनाचे संकट कोसळले. मंडपापासून काही अंतरावर असतानाच ज्या क्रेनवर या २७ फूट उंच मूर्तीचा भार तोलून धरला होता ती क्रेन कमजोर निघाली आणि क्रेनमधून निसटलेली राजाची मूर्ती सरळ खाली कोसळली.मंडळाचे अध्यक्ष संकेत नेवशे या मूर्तीखाली सापडले. त्यांना रिलायन्स रुग्णालयात मृत घोषित करण्यात आले.
पदाधिकारी बृजेश जोशी यांना जी. टी. रुग्णालयात मृत घोषित करण्यात आले. अन्य दोन जखमी दाखल आहेत. सैफी रुग्णालयात एक जखमी दाखल असून, जेजे रुग्णालयातही दोन जखमी दाखल झाल्याचे सांगण्यात आले.पोलिस उपायुक्त आर. रागसुधा यांनी सांगितले की, भुलेश्वरमधील समुद्रीमाता मंदिराजवळ हा प्रकार घडला. तो घडण्याची कारणे आम्ही तपासत आहोत. बंदोबस्त तैनात केला आहे. या संपूर्ण घटनेची रीतसर चौकशी होईल. आधी भुलेश्वर राजाची मूर्ती विसर्जित केली जाईल आणि मग प्राथमिक तपास करून गुन्हे दाखल केले जातील.असा अपघात होऊ शकतो? असे घडूच कसे शकते? या प्रश्नांनी मुंबईतील गणेश मंडळांचे धाबे दणाणले आहे. कुणाची मूर्ती सर्वात उंच ही स्पर्धा वर्षानुवर्षे शिगेला पोहोचत असताना अशीच उंच असलेली तब्बल २२ फुटांची भुलेश्वर राजाची मूर्ती क्रेनच्या केबलला झेपली नाही. भयंकर बाब अशी की कोसळलेल्या मूर्तीखाली मंडळाचे तरुण तडफदार अध्यक्ष संकेत नेवशेच सापडले.
अशा उंच मूर्ती पीओपीमध्येच तयार होऊ शकतात. शाडूच्या मातीतून तयार होणाऱ्या मूर्तीना मुळात या उंचीची मर्यादा येऊन पडते त्यामुळे उंचीची स्पर्धा खेळणाऱ्या मंडळांनी दरवर्षी पीओपीबंदी मोडीत काढण्यासाठी खटपटी-लटपटी केल्या. यंदाही कोर्टबाजी झाली आणि मुंबई उच्च न्यायालयाने मोठ्या मूर्तीचे विसर्जन समुद्र तथा नैसर्गिक तलावांत करण्यास तूर्तास परवानगी दिली. यासंदर्भातील अंतिम निकालापर्यंत ही परवानगी राहील. हा निकाल मागच्याच आठवड्यात आला आणि आता पीओपी पासून तयार केलेली भुलेश्वर राजाची महाकाय मूर्ती कोसळली.
अशा मूर्ती समुद्रात विसर्जन करतानाही खास तराफा न्यावा लागतो. तशीच काळजी मूर्ती मंडपात आणतानाही घ्यावी लागते.प्रत्यक्षदर्शीने सांगितले की, भुलेश्वर राजाचा भायखळा ते भुलेश्वर प्रवास तसा सुरळीत पार पडला. भुलेश्वर राजा गणेश मंडळाचे अध्यक्ष संकेत नेवशे यांनी भुलेश्वरच्या नाक्यावर या मूर्तीसमोर माजी नगरसेवक दिलीप नाईक यांच्यासह फोटो काढला. दुर्घटनेच्या १५ सेकंदांपूर्वी हा फोटो काढण्यात आला होता. तिथून प्रतिष्ठापनेची जागा एका मिनिटावर होती. तेवढ्यात राजाची मूर्ती कोसळली आणि यंदाच्या गणेशोत्सवावर दुःखाचे सावट पसरले!
